Deheim bim Blocher überem Schribtisch hänge Anker und au Hodler,
Sennebilder in de Bärge, Schteibögg, Jeger oder Jodler.
Gämsi, Kueglogge und Rehgweih hett är gschmaggvoll sich usgwählt,
Dasch doch gueti Schwyzer Kunscht, numme e Hirschhorn fählt.

Mit siner Popkarriere isch dr Michael Jackson jetzt am Änd,
Drum bsuecht är Witterbildigsworkshops für verborgeni Talänt.
Är schteckt sich ganz schnäll neyi Zyyl und nach ere kurze Aaschtandsfrischt,
Griegt är villicht no in Sankt Pölte d Schtell als Organischt.

Well dr Fritzli sini Uffzgi s ganz Johr gmacht hett und esoo,
Hett ihn dr Bappe zur Belohnig an e Usswärtspiil mitgnoo.
Am Bahnhof styyge denn die zwei in Äxtrazug nach Zyri yy,
Und sithär loht dr Fritzli d Uffzgi wider syy.

Bimne guete Wysse isch dr Couchepin gsässe und hett dänggt,
Dass wäg dene Granggekasse är jetzt reine Wyy yyschänggt.
Und bim letschte Gleesli Fendant do hett sich d Idee ufdrängt:
Jetzt wärde schtatt de Prämie d Promillewärt gsängt.

Z Basel wirsch nonem Entbinde grad als Modell gross lanciert,
Mit ballte Fischt und volle Windle fir Plakat fotegrafiert.
Inszeniert und nätt drapiert und trotzdäm brielt dä glaini Schatz,
Denn kuum hett är s erscht mol gschisse, stoht er in dr Baz.

S Dolly Buster isch fir ihri Video nach Basel koo,
Im Clarashopping sehsch uns Männer schtuune, glotze, Schlange schtoo.
Mer hänn dr Hakan Yakin gseh, au är kennts bis zum Überdruss:
Är seht au nur d Balle gumpe und kunnt nit zum Schuss.

Bimm Dieter Behring sim Schneeballsyschtem duets jedem Bängger gruuse,
Stecksch e halbe Frangge yyne, griegsch zem Aafoo hundert uuse.
Allem Aaschyyn aa hett GC au bim Behring inveschtiert,
Die hänn nämlig ei Gool gschosse und hänn acht kassiert.