Als Privatbangg sinn mir vier leider sit lengerem banggrott,
Drum sinn mir ans WEF go frooge, ob uns öpper hälfe wott.
Und nachme fiechten Ooben an der Hotelbar ischs denn bassiert,
Dr Brad Pitt und Angelina hänn is adoptiert.

Jä, die Stadt isch ideal, es hett do alles wo me wott,
Verkehrsaabindig, Schuele, Shopping, s kulturelle Aagebott.
Mir hänn das ganze gryndlig brieft und sage: „Jo, mir mache s au!
Sali Marcel und bis bald, mir ziehn uff Wollerau.“

„Mit Balari“, meint dr Kari „fahr i nümm“ und bstellt e Tee.
Dass das nyt nutzt, so meine mir, gseht me scho lang bim FCB.
Vor em Aapfiff dringgt dr Zubi bischbylswyys nie Alkohol,
Und trotzdäm hett dä kurz druffaaben immer ein im Gool.

Wäg dr Voogelgrippe wärde z Basel d Spatze grangg und schwach,
Au uff em Märtplatz falle d Duube noodisnoo vom Roothuusdach.
Und no ne grössre Vogel hett s grad kürzlig dört vom Himmel gschneit:
S isch d Saskia Frei wo nach em Höheflug uff d Schnuure gheit.

Unsre Nochber isch e Fän vo dr Pamela Anderson,
Drum hängt e Bild vo ihre oben-ohne dört uff sym Balkon.
Jetzt hett d Stadtbildkommission ihn biesst, denn die erlaubt o Gruus,
Bi so Helge ebe nur no ächts Holz vor em Huus.

Well s Theater jetzt muess spaare glopft men aa bim Landkanton
Frey nach Goethe frogt me: „Sag, wie hast du’s mit der Subvention?”
Dr Straumaa meint: „Mer hei kä Gäld, nur Personal, das hei mer gnue,
Mir schickä für nächscht Saison d Laiebüüni Rooteflue.“

Scho sit langem wünscht dr Fritzli sich e Hündli, sone gleins,
Drum goot är gärn in Wald go laufe, well dört trifft me amme eins.
Uff eimol kunnt Frau G mit ihrem Terrier uff em Wäg drhär,
Und sithär dänggt dr Fritzli, dass e Goldfisch besser wär.

D Kate Moss, die Drooge-Queen, nimmt schyyns vom Fyynschtaub vyyl und d Nase voll,
Wäg däm Skandal um Kokain isch s Image mies und nümm so toll.
Uff dr Suechi nach me Job isch si in Basel jetzt uffgrützt,
Und hett begeischderet am Sunntig do dr Schnee wäggschnützt.