Im Stadtcasino loost me aadachtsvoll dr Kammermuusig zue,
Dr Steinebärg isch teert und gfädret, ändlig herrscht dört inne Rue.
Nach kurzer Freud wird aber s Publikum vo neuem Ärger paggt:
Au ohni Drämmli bebbt jetzt d Ärde im Minutetaggt.

Dr Blocher dänkt: „Y bach mol Muffins für d Kollege, die häns gärn.“
Do längt är voll ans heisse Backbläch; Aua, aua, gällts durch Bärn.
D Micheline hörts und meint: „Dä Ofe het mit Politik vyyl z due,
Christoph, heb bi heissen Yyse besser d Klappe zue!“

Die neu Miss Schweiz, lägg isch die öd, die weggd bi uns vier keini Glüscht.
Uns hätt die Xenia besser gfalle, well die hett so schöni AUGE.
Drissig Joor Emma ändre nüt und mir ziehn schlicht nur no d Bilanz:
D’Alice Schwarzer het scho rächt, mir dängge mit dr RÄCHTE HIRNHÄLFTI!

Wells s Buech zum Film scho git isch es für d Gigi Oeri nur e Schritt,
Dass es scho gly zum Kaufen au en eigni Parfumlinie git.
Au bim FCB do proobt men amnen eigne Parfumduft
Und hett als erschts dr Draum vom Meischter in dr Luft verpufft.

D Gegner hänn Angscht vom Walujew, well dä isch hoorig, stark und fett.
Dr eint hett so viil Schiss ghaa, dass d Kneuschiibe d Flucht ergriffe hett.
S nögscht mol wenn mir vier wänn Wältklassboxe live in Basel see,
No kaufe mir Biljee fürs Meischterspil vom FCB.

Das Polatrium wo d Lütt vergiftet, isch mir z diefscht suschbäggd,
Du meinsch Plolonium, denn s’ander ischs Geotermin Projäggd.
Jä nei, s isch anderschd aber wie, jä weiss do keine was das soll?
Dasch vo dr Heute Redaktion e Sitzigsprotokoll.

Dr Roger Federer, das Tennis-As, dr Held vo dr Nation,
Für alli Sportler het sy Ballgfühl schyyns e Vorbildfunktion.
Ar drescht die Bäll knapp übers Netz nur s einzig wo uns dra verdriesst,
Gnau glych sehts us wenn Schwiizer Nati als Penalty schiesst.