Hett si oder hett si nid? Um d Hingis gits e Riisegschyss,
Und trotz Wöschmaschine vo V-Zug isch d Weschte nümm ganz wyss.
Los Martina gib nid uff, mir seen für dii en ächti Chance,
Versuechs doch statt bim Dametennis bi dr Tour de France.

Äxtrafiecht und superdünn und trotzdäm rissfescht mien sy syy,
Am beschte mit me Gietesiegel, denn s muess zimlig öppis dryy.
Mit Rille, Noppe und uss Läder oder Gummi oder Garn.
Isch uns doch schnuppe, Hauptsach s eignet sich als Glöpferdarm.

Dr Sarkozy, Ehrewort, dä Presidänt, dä isch e Witz,
Zuegä, do die Carla Bruni, mir verstöön en au e bitz.
Nur das d Saudis die nit wänn, das macht für uns halt gar kei Reim,
Mir hätte gseit du darfsch gärn ko, nur lo dr Alt deheim.

Är seit jetzt wiider was är dänggt und dänggt schyyns wiider was är sait,
Und är het vyyl me Zitt, me merggt jetzt, was är sait isch überleit.
Mir rede nid vom Blocher denn s isch schampar druurig hänn Si s ghöört?
S isch woor, dr -minu het mit em Traderaklatsch uffghört.

Mir vo de Aabrennte sin Füür und Flamme für die EM do,
Drum hän mir amne Workshop für mee Charme und Höflichkeit teilgnoo.
Dräffe mir e Schwoob denn sage mir ganz frindlig wie man muss:
“Schön dass Du da bist, weisch mir hän e sone Freud und Tschüss!”

Vor em Cumulus-Konzärt göön d Stones in Migros, s isch bequem,
Dr Mick Jagger hett e Freud, do gits M-Budget Faltecreme.
Im Keith Richards machts kei Spass, är isch verzwiflet und är fluecht,
Well är wie wild und doch vergäblig nach em Whisky suecht.

16 Milliarde isch e 16 mit nüün Nulle draa,
Dr Herr Ospel frogt sich schyyns won är die Summe finde kaa.
Liebe Marcel 16 Frangge hesch au du im Portmonee,
Und die 9 Nulle findsch no schnäll emol bim EHC.