Fir und vo liebe Frind isch s Zündhölzli/Brandloch e wunderbaari Fasnachtsbaiz zmitts im Härz vo dr Frau Fasnacht am Untere Heubärg 2. Offe isch dä sicheri Haafe wie folgt:

Am Sunntig ab Mitternacht
Am Mäntig ab de Fünfne
Am Zyschtig au ab de Fünfne
Am Mittwuch nadyrlig au ab de Fünfne

Lueged also unbedingt yyne uff en original Aabrennte Bier und dr aint oder ander Spitze-Bangg!

Gryyse linggs und Abschwung rächts, spüüre sis im Portmonee?
Au d Schnitzelbängger sinn betroffe, das kasch an dr Fasnacht see.
D Peperoni-Kue git nur no Maagermilch, und die isch suur,
Als grupfts Huen macht au dr Singvogel e druurigi Figur.
Dr Gaasladärne drait dr Putin sofort d Gaasversorgig ab,
Und d Ständerlampe lüüchtet halt nur no mit 25 Watt.
Well iim s Gäld nümm längt foot plötzlig schyyns dr Schorsch au widr aa,
Und dr Fäärimaa schafft als Pirat no vor Somalia.
Dr Pierrot frogt bim Zirkus Knie «Los bruche dir ägschd non e Gloon?»
Und die Verschiffte mälde sich bim Grand Prix d’Eurovision.
Dr Doggter FMH muess leider d Schweschter Erika entloo,
Statt mit em Taxi mien jetz d Striggede halt z Fuess in d Beize koo.
Nur die Aabrennte sinn bishäär vo dr Gryyse rächt verschoont,
Mir sinn scho immer abbrennt gsi, und dorum s Spaare gwoont.

Es fluecht und schwitzt en Ingenieur in Gänf im CERN in grosser Noot,
Well trotz Milliarde-Köschte dört das Grät nicht richtig goot.
«Jä nei, i will doch schwarzi Löcher» meint är «s isch e Riise-Stress.
Und denn entstöön die Sieche immer bi dr UBS.»

Wirtschaftskrise, Bryyszerfall, d Sache koschte bald nüt mee,
Seit dr Bush zue siner Frau «I has mit eigne Auge gsee.
I ha die diefe Bryyse damals im Irak scho nit begriesst,
Dört sinn d Schue so billig, dass me si eim noocheschiesst.»

Dr Ospel isch jetz Babbi und mir winsche drum dämm ryffe Maa,
Dass är s Windel-Management au in sim Alter leere kaa.
Mir hoffe, dass es dört um si Talänt e bitzli besser stoot,
Wells bi iim erfaarigsgmäss am Schluss in d Hoose goot.

Mit dämm Dekolletee hett d Kanzlerin uns lyycht hypnotisiert,
Aber sehr schnäll hänn mir gmerggt, dasch alles knallhart kalkuliert.
Offesichtlich längts dass d Merkel aimol d Buuse offe dreit,
Und die ganzi Schwyyz stimmt plötzlig für Freizügikeit.

Dr Sämi Schmid isch hässig uff dr Nef, uff s Internet und so,
«Hätt ich begriffe, was dä macht, dä hätt si Job doch nie bikoo.»
Mir finde, irre isch doch menschlig, Sämi bisch e flotte Maa,
Sogar dr Papscht stellt schliesslig ab und zue die Lätzen aa.

Dr Piusbrueder Williamson isch, was dr Farbton Bruun betrifft,
Sehr empfänglig, är liist d Bible bsunders gärn in Ruuneschrift.
Und wenn me hört, was uns dr Blocher nach em Stimme prophezeit,
Denn wärde bald 60% vo uns zue Bischöff gweit.

Im lingge Driibwärgg 15 Änte und im rächte no 10 Schwään,
Trotzdäm landet dä si Vogel, alles fyyrt dr Kapitään.
«Dasch no gar nüt», meint dr Ospel, wo vor Nyyd grad zimlig kocht,
Schliesslig heig är ganz elei a Bangg an Boode brocht.

Mir hänn zum Botellon yyglade und mir schriibe alli aa,
Via Facebook, MySpace, Festzeit, Studi VZ Punkt ch.
Kömmed alli, es git gratis Schämpis, Musik und no mee,
D Rächnig schigge mir zum Abschied denn dr IWB.

Dr Finanzminister Steinbrück hett e Wuet, är schreit und spuggt.
Är hett Schuum am Muul und schwingt scho d Peitsche - isch dä Maa veruggt?
Mir empfääle iim e Wellness Urlaub, wyt wäg vo dehei,
Imne Hotel uffem Land - wie wärs mit Liechteschtei?

Anne-Käthi, iss di Zmorge, hesch gnueg gschloofe in dr Nacht?
Hesch di Znüniseggli yypaggt und au d Uffzgi alli gmacht?
Seisch dr Lehrerin vo mir e Gruess denn griege mir kei Buess,
Wenn si di Buschi in dr Turnstund widr hiete muess.

Ändlig frei und s Wätter guet, d Sunne lüüchtet warm und häll,
Mir sinn fit und mache dorum Wanderdääg im Appizäll.
Doch bim Picknick an dr Füürstell schreit ys plötzlig eine dryy,
«Das isch verbotte, pagget sofort euri Würschtli yy.»

Vo «USA bedroot jetz d Schwiiz» bis «Unseri Bangg het dr Salat»,
Vo «Unterstützig bitte schnäll» bis «Unsri Boni zaalt dr Staat».
Mir sinn «Uffbrocht bis Schockiert» nur isch dä Name uns nid ney,
Mir wüsse lengschtens, dä heisst «Uuse, Buuh und Sauerey!»