In Basel shoppe will dr Thierry, dä vo Michelbach-le-Haut,
Mit sym Renault faart är falsch und isch ins Gundeli nur koo.
Dört isch grad Gratis-Speerguet und das isch im Thierry no so rächt,
Und meint deheim zur Frau: "Das Stücki Center isch nit schlächt."

Als Politiker do kunnt e Ruggdritt leider sehr oft z spoot.
So isch au dr Punggt zem goo scho doo für mänge Bundesroot.
Vyyl lyychter findsch dä Punggt im Sport, drum isch dr Tiger Woods no frisch:
Dä weiss halt immer sehr genau wenn är am G-Punggt isch.

Hällwach sait dr Ruedi Merz zue syner Frau im Ehebett:
"Ich möcht e Sunnebrülle haa wie dr Gaddafi eini het.
Denn wirgg i au so stargg und cool aber dr gröschti Vorteil draa,
Isch dass i ohni dass ein mergt e bitzli schloofe kaa."

In sym Club do git dr Carli Hirschmaa gärn so richtig Gas,
Är schnupft und sufft und schloot und joolt und bi de Fraue nimmt är Mass.
Für das nimmt är e Reis nach Basel öppedie no gärn in Kauf,
Aber nit vor Gricht, är will nur an Harrasselauf.

Dr Berlusconi ghöört, so meint ein, in Kultur mol instruiert,
Und hett als Noochhilf, im vo noochem mol dr Doom vor Auge gfiert.
Sehr sympathisch fändes mir wenn sich so eins zum andre fiegt,
Und bald dr Mörgeli e Minarett in d Schnuure griegt.

In sym Chalet z Gschtaad sitzt dr Polanski gmietlig grad bim Znacht.
Syni Frau serviert im Roote und het Fotzelschnitte gmacht.
Und drotzdäm isch dä Maa nit zfriide, well dr Wyy im halt nit gfallt:
Es isch e 95er Joorgang und das isch im z alt!

Inspiriert vom Duurm vo Dubai het dr Fritzli d Bauklötz gnoo,
Und im Kindsgi konzentriert die erschte uffenander doo,
Aber wyt isch är nid koo, wells d Lehrerin verbotte het,
„Fritzli soo laufts nit, du bausch mir doo kei Minarett!“

Jo Dangg iPod, iPhone, iPad hesch die Muusig jetz drbyy,
Wäg dene Downloads göön au z Baasel alli Platteläden yy.
Und e Bligg an d Gränze zeigt dass es in Dütschland au so lauft,
Dört isch d Merkel jetzt die einzig, wo no CDs kauft.

D Amis mache mächtig Drugg und d Schwoobe bloosen is dr Marsch.
Vyyle Dangg ir tolle Banker, s Schwyzer Image isch am Aaschlaag.
Nur d Michelle Hunziker git alles, so als gueti Schwyzer Frau:
Si verzellt e Huffe Kääs und Bärge het si au.

D UBS im Stimmigs-Dief, d Kunde sinn uff und drvoo.
“No drey Monet", dänggt dr Grübler, "und au yych bi nümme doo."
Nur d Skulptur vom Giacometti loot in lächle in dr Noot,
"Au bi ihm bruchts hundert Kischte für ei Maa wo goot."

D Konkurränz macht langi Häls dr Simi Ammann fliegt drvoo.
In Öschtryych wird me kritisch und het d Bindig unter d Lupe gnoo.
Im Labor wird den schyyns dr Grund für si unbrämmst Erfolg entdeckt,
Är haig in jede Ski e Pedal vo Toyota gsteckt.

S Drama vo dr Pandemie

Us em Weschte kunnt e Grippe, duet sich rasend schnäll verbreite,
D Schwyz will entschide reagiere, aber das brucht Ewigkeite.
"In Ängland gits die erschte Doote", riefe mir in Angscht und Noot,
"Bi uns herrscht Ornig" kunnt do d Antwort, "schysseglyych wie lang das goot."

Und me prööblet, plaant und teschtet und duets nomol überpriefe,
"Als EU-Mitglied giengts schnäller", hörsch e Blocher-Gegner riefe.
Diräggt uff Bärn hänn mir aaglütte: "Gänd jetzt Gas ir dumme Glöön",
"Vo uns gits gar nüt", hörsch si sage, "das ischt Sache der Kantöön".

Und scho driffts e Maa in Klote und d Verwirrig isch gigantisch,
Well kein weiss ob dä nur Zürcher oder anderwytig Grangg isch.
Wältwyt sinn si scho am Impfe , sogar in Dütschland, das spricht Bänd,
Und mir warte, warte, warte und mir wäschen unsri Händ.

Mir draage Massge, Händsche, Hüübli und Pariser zum is schütze,
Nämme dääglig non e Chlorbad, hoffe s däti öppis nütze.
Denn nach gfüülte Zää Dekade, kunnts OK, dr Stoff drifft yy,
Und jetzt wo me könnti Impfe, isch die Grippe scho verbyy.