Fasnacht 2021
Mir hänn s kuum können erwarte aber leider wird s am 22. Februar nit loos goo mit dr 18. Aabrennte Fasnacht! S Coronaviirus het d Frau Fasnacht fescht im Griff.
Us gegäbenem Aaloss…
Kei Morgestraich im zweite Joor,
D Frau Fasnacht griegt scho graui Hoor.
Au d Schnitzelbängg, die stöön im Rääge,
S isch Singverbot, vo Amtes wääge.
Nur dr lokaali Fäärnseesänder,
Läänt sich e bitzli übers Gländer.
Mit Bängg, wo keine live dörf lache,
Würd me dört gärn e Sändig mache.
Us Freud an Pointe, Witz und Zoote,
(Und au an guete Yyschaltquoote.)
Ob me das erlaube kaa?
Frogt me bim Gsundheitsdep. denn aa.
Dört winggt vom bsunders hooche Ross,
Dr Ängelbärger – #Seifiboss.
«Als Preesi vo de Gsundheitsdiräggdoore,
Ha im Humor ich lengscht abgschwoore.
Wo käämte mir denn do nur aane,
Es wird nit gsunge, Nundefaane!
Nit in dr Duschi, nit im Saal,
UND AU NIT IM TV-KANAL!»
Doch dää Dropfe bringt jetzt s Fass,
Zum Überlaufe, und zwar krass!
Denn heilig isch für uns, muesch see,
Nur d Fasnacht – und dr FCB.
So kunnt s zur Shitstorm-Explosion.
Und online zun ere Petition.
Värs-Zensur!, motzt me im Waan,
Mir sin doch do nit im Iran!
Im Ängelbärger wird s drab bang,
Und bald kräbst äär im Ruggwärtsgang.
Au iim sig d Fasnacht nit egal.
(Und au die eigni Wiiderwaal.)
Jetzt duet die Uffnaam doch no glinge,
Und au mir, mir DÖRFTE singe.
Die meischte juble und sin froo,
Nur mir sin leider gar nit doo.
Denn ooni Publikum vor Ort,
Wird s Bänggle schlicht zum Drogge-Sport.
Mir mache s nögschd Joor wiider s Kalb,
Und griesse – vo dr Bettmeralp.
Do kasch loose, luege, stuune, ganz ooni Corona oder au mit. Bsunders wenns yyskielt isch… Värs vo 2020.
Immer uff em laufende
